හරිත නායක වැඩසටහන විද්‍යාපීඨවලට හඳුන්වා දීමේ සමාරම්භක වැඩසටහන

Details

1980 අංක 47 දරණ ජාතික පරිසර පනතින් ස්ථාපිත කරන ලද මධ්‍යම පරිසර අධිකාරිය 1984 වස‍රේ සිට අධ්‍යාපන අමාත්‍යාංශයේ පූර්ණ සහයෝගය ඇතිව පාසල් පරිසර නියමු වැඩසටහන හා අනෙකුත් අධ්‍යාපනික වැ‍ඩසටහන් ක්‍රියාත්මක කරනු ලබයි.

මීට සමගාමීව, මධ්‍යම පරිසර අධිකාරිය විසින් අධ්‍යාපන අමාත්‍යංශය, ජාතික අධ්‍යාපන ආයතනය හා ඒකාබද්ධව ජාතික අධ්‍යාපන විද්‍යාපීඨ තුළ ක්‍රියාත්මක කිරිම සඳහා "හරිත නායක වැඩසටහන" පිළියෙල කරන ලදී. මෙහි ප්‍රධාන අරමුණ වනුයේ ගුරු ශික්ෂණලාභියා පරිසර වගකීම්වලින් බැදුණු ජීවන රටාවකට හුරුකිරීම, පරිසර සංවේදී පුද්ගලයෙකු කිරීම හා පරිසර සංරක්ෂණ‍යෙහිලා නියමුවකු කිරීම මෙන්ම පාසල් පරිසර වැඩසටහන් සක්‍රීයව ක්‍රියාත්මක කිරීමය. මෙම සකස් කරන ලද වැඩසටහන 2024 වසරේ සිට සියලුම අධ්‍යාපන විද්‍යාපීඨවල ක්‍රියාත්මක කිරීමට මධ්‍යම පරිසර අධිකාරිය බලාපොරොත්තුවේ.

පීඨාධිපතිවරුන්ගේ මූලිකත්වයෙන් කථිකාචාර්‍යවරුන්ගේ මෙහෙයවීමෙන් ක්‍රියාත්මක වන ඉහත වැඩසටහනට පදක්කම් ක්‍රියාවලිය, පරිසර කඳවුර, පරිසර විෂය පිළිබඳ පුහුණු වැඩසටහන්, පරිසරය‍ට අදාළ විවිධ ක්‍රියාකාරකම්, පරිසර ව්‍යාපෘති ආදී ක්‍රියාකාරකම් ඇතුළත් වේ. මෙම වැඩසටහන අධ්‍යාපන විද්‍යාපීඨවලට හදුන්වා දීමට අදාළ මූලික පියවරක් ලෙස අධ්‍යාපන විද්‍යාපීඨ 19 හි තෝරාගත් කථීකාචාර්‍යවරුන් පුහුණු කිරී‍මේ වැඩමුළු කොළඹ, නුවර හා වව්නියාව දිස්ත්‍රික්ක කේන්ද්‍ර කරගනිමින් මධ්‍යස්ථාන තුනක 2023 වසරේ දී පවත්වන ලදී.

මෙම වැඩසටහන අධ්‍යාපන විද්‍යාපීඨවලට හදුන්වාදීමේ සමාරම්භක උත්සවය ගරු අධ්‍යාපන අමාත්‍ය සුසිල් ප්‍රේමජයන්ත් මැතිතුමාගේ හා ගරු පළාත් සභා, පළාත් පාලන සහ පරිසර රාජ්‍ය අමාත්‍යජානක වක්කුඹුර මැතිතුමාගේ ප්‍රධානත්ව‍යෙන් 2024.03.26 දිනමහරගම, ජාතික අධ්‍යාපන ආයතනය ශ්‍රවනාගාරයේ දී පැවැත්විය. මේ සඳහා අධ්‍යාපන විද්‍යාපීඨ නියෝජනය කරමින් පීඨාධිපතිවරුන්, කථිකාචාර්යවරුන්, මහරගම අධ්‍යාපන විද්‍යාපීඨයේ ගුරු ශික්ෂණලාභීන්, මධ්‍යම පරිසර අධිකාරියේ පළාත් හා දිස්ත්‍රික් කාර්යාල නියෝජනය කරමින් වැඩසටහනට සම්බන්ධ නිලධාරීන් ඇතුළු 300 කට අධික පිරිසක් සහභාගි විය.